BUDOL ‘YAN: ‘Unclaimed relief allowance’ para sa senior citizens mula umano sa DSWD, tunay nga ba?

• Scam lamang ang umiiral na text messages hinggil sa ‘relief allowance’ na maaaring makapang-biktima ng senior citizens

• Sabi ng DSWD, ang tunay na cash assistance ay ipinapamahagi lamang nito mula sa Crisis Intervention Unit ng ahensya

• Iniulat ng PNP na maaaring naging hudyat ng pagdoble-kayod ng text scammers ang nalalapit na SIM card registration deadline.

(2-min. read) - Scam lamang at hindi makatotohanan ang text messages na kumalat kamakailan na nagpoposturang galing sa Department of Social Welfare and Development (DSWD) at namamahagi umano ng ‘relief allowance’ sa senior citizens.

‘Relief allowance’ scam

Sa isang pahayag ng DSWD, sinigurado nitong hindi nagmula sa ahensya ang naturang text scams na tinatarget ang mga nakatatanda. Dagdag ng DSWD, wala rin itong ipinamamahaging ‘relief allowance’ sa senior citizens. Ayon sa ahensya, ang text message na ito ay naglalaman ng sumusunod na pahayag: “Good Maam/Sir, Your UNCLAIMED relief alliwance, for senior citizens/retires business owners. Email ADMIN on how to claime it.” 

Mapapansing hindi maayos ang pagpapakilala ng sender sa text message, at naglalaman rin ito ng ilang typographical errors. Ibinibilang rin nito sa kaniyang mga target ang “retired business owners”. Dagdag sa babala, ipinaalala rin ng DSWD sa publiko na ang tunay na financial assistance na ipinapamahagi nito ay maaari lamang makuha mula sa Crisis Intervention Unit ng ahensya sa central office at regional offices nito.

Sa isang interview, nabanggit ni DSWD Secretary Rex Gatchalian na inaakit ng scammers ang senior citizens na pumasok sa isang organisasyon na di-umano ay may dagdag na benepisyo. “May tendency na kakapit na agad sa pinaka madaling tingin nila na avenue,” ani Gatchalian. Dagdag nito, hindi inaabot ng DSWD ang publiko sa pamamagitan ng text messages, at walang dagdag na bayad ang pag-claim ng benepisyo mula rito.

Scammers, nagmamadali?

Sa isang pahayag, sinabi ni PNP Anti-Cybercrime Group (ACG) Director Brig. Gen. Joel Doria na nagkukumahog ang text scammers na mag-kondukta ng mga illegal money-making operations dahil umano sa papalapit na deadline ng SIM card registration sa ika-26 ng Abril. 

“The scammers are now also working double time because of the SIM card registration deadline. But we are monitoring all the fraud perpetrated through the use of SIM cards and as of December 2022 to January 2023, we have recorded cases,” ani Doria.

Noong 2022, nagsumite ng isang bill si Senator Jinggoy Estrada na naglalayong maprotektahan ang senior citizens laban sa text scams. Ang Senate Bill No. 671 o “Senior Citizens’ Fraud Education Act”, ayon kay Estrada, ay magtatayo ng isang inter-agency centralised service na magbibigay ng impormasyon at serbisyo sa senior citizens upang maunawaan ng mga ito hinggil sa text scams. Ayon kay Estrada, madalas nabibiktima ang senior citizens ng online scams dahil hindi marunong ang karamihan sa mga ito sa teknolohiya ngayon.

SOURCES:

[1] https://www.facebook.com/brigadanewsfmnational/posts/574066078093241 

[2] https://newsinfo.inquirer.net/1730186/fwd-dswd-beware-of-scams-saying-theres-relief-allowance-for-seniors-and-retirees 

[3] https://ncr.dswd.gov.ph/about-us/citizens-charter/assistance-to-individuals-in-crisis-situations/ 

[4] https://www.manilatimes.net/2023/01/17/news/national/register-sim-cards-now-avoid-deactivation/1874556

[5] https://mb.com.ph/2023/02/13/pnp-dict-step-up-drive-vs-last-hurrah-of-scammers-using-unregistered-sim-cards/ 

[6] https://www.cnnphilippines.com/news/2022/8/28/Estrada-bill-seeking-to-educate--protect-senior-citizens-vs.-scams.html 

[7] https://legacy.senate.gov.ph/lisdata/3856735023!.pdf