FALSE: Bagong P1,000 polymer bill, hindi tinatanggap sa SM Supermalls kapag may tupi?

• Tumatanggap pa rin ng P1,000 polymer bills na may tupi ang SM Supermalls
• Ayon sa BSP, ang maaari lang na hindi tanggapin ay pera na sadyang sira-sira at may marka o sulat.
• Nananawagan si Sen. Pimentel sa BSP na isuspinde ang paggawa ng polymer bills

(2 min. read) – Ayon sa viral post ng isang netizen, bawal itupi ang bagong P1,000 polymer bill matapos itong hindi tanggapin bilang pambayad sa isang SM Supermall branch.

Ano ang pagkakaiba ng banknote na polymer sa abaka?

Inilunsad ng BSP ang polymer bill na may bagong disenyo noong Abril ng taon na ito. Ang polymer banknote ay sinasabing mas matibay kumpara sa lumang pera na gawa sa abaka. Ayon sa BSP, mas maikli ang itatagal ng virus sa polymer bill at ito rin ay may seguridad na kontra sa pamemeke. 

SM Supermalls, tumatanggap pa rin ng nakatuping P1000 polymer bill 

Sa pahayag ng SM Supermalls, tinawag nilang “misleading” ang kumalat na post at sinabing tumatanggap pa rin sila ng P1,000 polymer bills na may tupi sa kanilang retail stores. Ang perang sira-sira, may butas o may punit mula sa staple wire lamang ang hindi nila tatanggapin. Ito raw ay nakabatay sa patakaran ng Bangko Sentral ng Pilipinas (BSP). 

Opisyal na pahayag ng Bangko Sentral ng Pilipinas (BSP)

Sa paglilinaw ng BSP, maaari pa ring gamitin na pambayad ang perang papel o polymer bill na may tupi. Dapat din itong tanggapin sa mga transaksyon ng retailers at bangko. Iginiit ng BSP na ang unang patakaran na inilabas ay para lamang mabigyan ng kamalayan ang publiko sa wastong paggamit sa bagong polymer banknote. Kabilang dito ang pag-iwas sa labis na paglukot o pagtupi, pagdidikit, at paglalagay ng sulat o marka. Dagdag dito, ang pera na may staple wire ay dapat pa ring tanggapin bagaman hindi inirerekomenda ng BSP. Pinapaalala ng BSP na ang sadyang pagsira ng pera, papel man o polymer, ay may karampatang parusa alinsunod sa Presidential Decree No. 247 na inilathala noong 1973.

Sen. Pimentel, hinimok ang Senado na imbestigahan ang BSP

Kasunod ng viral post na ito, nanawagan si Sen. Koko Pimentel sa BSP na isuspinde ang paggawa ng P1,000 polymer bills. Iginiit niya na ang paglabas ng polymer banknote ay “impraktikal” sa gitna ng mga patong-patong na reklamo ng publiko.

Hinimok ni Sen. Pimentel ang Senado na maglunsad ng imbestigasyon laban sa BSP sa biglaang pagbabago ng disenyo ng mga banknote at barya. Kaniya ring ikinatwiran na ang paggamit ng polymer bilang pangunahing produkto sa paggawa ng banknote ay maaaring magkaroon ng negatibong epekto sa ating lokal na industriya ng abaka.

SOURCES:
[1] https://newsinfo.inquirer.net/1626086/social-media-post-on-rejected-p1000-polymer-banknote-goes-viral
[2] https://www.pna.gov.ph/articles/1171715
[3] https://newsinfo.inquirer.net/1586723/bsp-new-p1000-bill-worth-only-p1000
[4] https://www.facebook.com/smsupermalls/posts/5333847079994813
[5] https://www.bsp.gov.ph/SitePages/MediaAndResearch/MediaDisp.aspx?ItemId=6362
[6] https://www.bworldonline.com/banking-finance/2022/07/13/460802/folded-paper-or-polymer-banknotes-are-valid-bsp/
[7] https://www.facebook.com/BangkoSentralngPilipinas/posts/395152812647232
[8] https://newsinfo.inquirer.net/1630177/bsp-stapled-banknotes-still-acceptable
[9] https://www.officialgazette.gov.ph/1973/07/18/presidential-decree-no-247-s-1973/
[10] https://www.cnnphilippines.com/news/2022/7/12/Pimentel-asks-BSP-to-stop-issuance-1000-polymer-bills.html
[11] https://www.gmanetwork.com/news/topstories/nation/837941/pimentel-wants-probe-on-impractical-p1k-polymer-bills/story/
[12] https://mb.com.ph/2022/07/13/pimentel-urges-senate-to-probe-bsp-for-impractical-p1000-polymer-banknote/